美國西部牛仔的浪漫－羚羊峽谷 (Antelope Canyon)
細個個陣，卡通片上既西部牛仔總係好型咁，
而我對美國西部既印象，就係沙漠、仙人掌同馬，
感覺係遙不可及，係一個永遠想去，但總係的唔起心肝去既地方，
你需要知道，美國就算係多年前開始有直航，都最少飛13、14個鐘，
你估真係人人都搭到咁長途既機嫁咩？
上年既呢個時期，見到啲同事朋友開始不約而同去左個地方，
而大家身後既背景係一堆既獨特又迷人既啡色岩石，
而大家都影左一堆堆既chok相。
哥我對呢個地方深感興趣，於是就係網上狂搵資料，先發覺個度係一個世界知名既攝影景點，
難怪靚到人間天堂咁既款啦！
靚還靚，去呢個地方真心唔易，
因為佢位處美國西南部亞利桑那州Arizona同佩吉市Page附近，
既要搭長途車，又要穿洲過省，無翻咁上下既精力，邊到頂得順？
有唔少人會選擇係Las Vegas或者Los Angeles 自己揸車去，又平時間又易就，
不過對於哥我唔識揸車黎講，
只要報local tour報得精明，有架好好既車同好好既導遊，
去Antelope Canyon一樣不是夢！
今次哥就係Vegas join local tour出發 ，
個度啲tour真係多到不得了，俾大家一個小貼士就係如果你真係要好平好平既tour，
大家不妨join啲由當地中國人辦既tour，雖然好平不過你就預左tour guide既態度十分麻麻，
如果你報啲少人既private tour，價錢會貴啲不過行程上就有得商量，比較易控制，
而且tour guide的人都很好！
我就選擇左後者，因為我真係好怕人多多，
不過前者後者都好，大部分tour都會係大約朝早06:30am係酒店pick up你，
因為由Vegas出發要大約4個幾鐘既車程先到達Antelope Canyon，
所以通常tour會係大約夜晚09:30pm先會翻到你Vegas既酒店，
坐咁耐車咪話唔辛苦！
我個導遊真係好唔錯，一路上成日同我地又講又笑，
不過我實在太眼訓，係車上又訓又醒，不過我都好俾面會俾下反應，哈！
同團除左有我朋友同我一個同事之外，仲有對以色列夫婦同印度夫婦，
一行七人就出發。
重要既事講三次，包水包水包水，
由我book join開始，其中一項優惠就係有無限樽裝水供應，
看似唔重要既一環其實好重要，因為成個trip又熱又乾，所以大家好需要補充足夠既水份，
另外大家如果想去，我諗大家都係早啲book定啲tour好，否則到時候大家去到Vegas先知道full哂，
真係喊出黎。
司機會係一開始話你知去Antelope Canyon既途中會大約停幾多次車，
一黎佢入下油二黎又可以俾你買下早餐買下snacks咁。
而且導遊又會不時咁介紹經過既地方，
四個幾鐘，其實話咁快就過！
導遊話我地知Arizona同Las Vegas係有一個鐘既時差，
不過對於我地呢啲即日來回既人黎講，
一個鐘時差，又算是什麼！
我地tour第一個drop off point係Glen Canyon Dam葛蘭大壩，
葛蘭大壩為美國第二大水壩，而水壩旁亦形成鮑威爾湖，
係鐵橋上望落去，都幾壯觀下，但咪以為咁就完，
葛蘭大壩只係成個旅程既開始，用過多十幾分鐘既車程，我地就到左今日其中一個重點，
Antelope Canyon。
Antelope Canyon是一個由當地印第安人管轄同經營既一個旅遊景點，
佢既由來據講係因為印第安人追逐羚羊既時候發現既，
而呢度係晴天既時候係乾既，但由於由河流切割而成，
假如落雨既時候，上游地帶會有大雨水沖落去，
所以Antelope Canyon曾經試過發生遊客被急流沖走溺斃既慘劇，
不過大家只要跟團去，都唔會發生呢啲危險既事，
因為佢地都會係好天出團，
然後俾大家入去睇最知名既峽谷光束啦，
不過由於我地跟團，而後面都有好多團，所以就比較人頭湧湧，
如果大家有機會自己揸車去，不妨可以join個4小時既拍照tour，
攝影發燒友包你地影光束影到夠。
溫馨提示，大家去Antelope Canyon真係唔好著白色波鞋，
因為沙石都係呈咖啡色，所以當大家去完成個tour既時候，你會發覺，
你對鞋要報銷。
講多無謂，俾大家睇下啲chok相，
你就知道，
Antelope Canton呢個地方，真係神奇得黎又靚又chok。
#又去美國
#AntelopeCanyon係我其中一個最想去既地方
#好想去美國中部遊
#扮下西部牛仔
-----------
IG：www.instagram.com/andrew.flyingdiary
FB：@安德魯
Search